Ордабасы ауданы Темірлан ауылының тазалығы көз тартып, тотыдай таранып тұрса – бұл «Темірлан Абаттандыру» КММ-нің қызметкерлерінің еңбегінің жемісі. Жыл он екі ай ауданның орталық Абасов, Қажымұқан көшелерінен бастап, көше-көшелерін сыпырып, тал отырғызып, әктеп қураған бұталарды қырқып, көгалдарды реттеп, таңның атысы, кештің батысы тынбайтын, күйбеңі бітпейтін мекеме жұмысшыларын байқамау мүмкін емес.
Бүгінде мекеме қызметкерлері «Таза Қазақстан» акциясы аясында Темірланның көшелеріндегі ағаш бұтақтарын қырқу жұмыстарын жүзеге асырып келеді. Яғни Абасов көшесіндегі жүк көліктеріне кедергі келтіретін талдарды күзеп қырқып шығуда.
Қазіргі таңда облыстық маңызы бар автожолдың, ішкі көшелердің бойындағы арық-атыздарды тазалау жұмыстары жүргізілуде. Осы жұмыстарға 3 техника жұмылдырылып, тазалық жұмыстары барысында 8 тоннадан астам қоқыс шығарылған. Ал нақ осы ауқымды жұмыстарға «Темірлан Абаттандыру» КММ-нің 35 маманы жұмылдырылған.
Сонымен қатар аудан орталығындағы қоғамдық көпшілік орындарына тазалық жұмыстарын жасап жол жиегі, аялдама, аллея мен балалар ойын алаңшасының тазалығын да бұл мекеме назардан тыс қалдырған емес.