Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауында еліміз үшін өте маңызды бағыттарды айқындап берді. Президент жиынды соңғы 5 жылдағы өзгерістер және саяси реформалардан бастады. Жолдауда экономика, бизнес, агроөнеркәсіп, инвестиция тарту, экология, цифрландыру, инфрақұрылым мәселелері және өзге де салаларға қатысты жаңа міндеттерді жүктеді.

Әлеуметтік салаларға байланысты атқарылуы тиіс нақты жұмыстарға тоқталды. Білім саласында білікті кадр тапшылығы проблемасын шешу, инновацияға басымдық беру сөз болды. Қазақстан бойынша «Жайлы мектеп» ұлттық жобасы негізінде 2025 жылдық соңына дейін 217 мектеп пайдалануға беріледі. Оның 63-ін Түркістан облысында салу жоспарланған. Заманауи мектептер, үздік оқу бағдарламасы, талапты ұстаз ұстанымын жалғастырамыз. Денсаулық саласында кешенді шаралар қолға алынбақ. Медициналық сақтандыру жүйесінің базалық топтамасы жасалады. Сондай-ақ заңнама жаңартылып, оған бұқаралық спорт пен балалар спортын дамыту жөнінде өзгерістер енгізіледі. Бюджеттің басым бөлігі әлеуметтік салаға бағытталады. Үкіметке келесі жылдан бастап «Әлеуметтік әмиян» жобасын іске қосу тапсырмасы берілді. Қоғамда еңбекқор және нағыз маман идеясын насихаттау мақсатында 2025 жылды Жұмысшы мамандықтары жылы деп жарияланды.

Әкімдерді тікелей сайлау — халықтың талабы. 2021 жылдан бері 2,5 мыңға жуық әкімнің 60%-ы мүлдем мемлекеттік қызметте жұмыс істемеген. Жұртшылықтың таңдауымен құрам жаңартылды. 2025 жылдан бастап аудан және облыстық маңызы бар қала әкімдерінің сайлауын өткізу жалғасын табады.